ஏப்ரல் சந்திப்பு: புத்தக கலந்துரையாடல், ஜெயமோகன், சங்க பாடல்கள்

நம் நவீன இலக்கியவாதிகளில் கணிசமானவர்களுக்கு மரபுடன் அறிமுகமே இல்லை. பலருக்கு மரபு என்பது தேவையற்றதாக, அன்னியமானதாக உள்ளது. வாசகர்களில் இந்த மனநிலை இன்னும் விரிவாக உள்ளது. எந்த மேற்கத்திய இலக்கியங்களை அவர்கள் ஆதர்சமாகவும் முன்னோடியாகவும் கண்டு வாசித்து வருகிறார்களோ, அந்த மேற்கத்திய இலக்கியங்களை ஆக்கிய படைப்பாளிகளுக்கு தங்கள் மரபுடன் ஆழமான உயிரோட்டமான உறவு உள்ளது என்பதை இவர்கள் மறந்து விடுகிறார்கள். தங்கள் மரபுகளில் இருந்துதான் அவர்கள் முளைத்தெழுந்தார்கள். நமது மரபிலிருந்தே நாம் முளைத்தெழ முடியும். நாம் விரும்பினாலும் விரும்பாவிட்டாலும் நமது மொழியிலும் சிந்தனையிலும் நம் மரபு உறைந்துள்ளது. நம் மரபைக் கற்றால் நம்மை ஆய்வு செய்து அறியவும் அதனடிப்படையில் தீவிரமாக செயல்படவும் முடியும். மரபை உதாசீனம் செய்தால் நம்மை நாமே அறியாதவர்களாவோம். அந்நிலையில் நம்மால் மேற்கை பிரதியெடுக்கவே முடியும். இங்கே அதிகம் நிகழ்வது அதுவே. இந்தச் சிறு நூல் நம்மரபின் மிகச் சாரமான பகுதியைப் பற்றிய ஒரு ரசனையை உருவாக்க உதவும்.